Pengalaman Pai Mandaki ka Marapi ( PART I )

Assalamualaikum sanak... ☺

Ambo buek blog baru, di blog ko ambo kabacarito tentang kisah-kisah hiduik yang alah pernah ambo jalani,atau bisa juo bacarito tentang kehidupan yang ambo caliak disekitar.

Perkenalkan namo panjang ambo Rahmat Fajri, 

Ambo dulu TK kawan TK ambo maimbau (Rahmat), haaa pas di SD kawan SD ambo maimbau (Camaik),pas SMP kawan SMP ambo maimbau (Maik), a pas STM lai batuka stek kawan ambo ma imbau (Aji) heheh Pas kuliah , lai yang maimbau (Aji) lai juo yang ma imbau (Maik). Ambo kini ko masih manganggur, masih mancari cari karajo huhuhu ambo tamatan D3 Listrik bulan Oktober 2016 di salah satu kampus yang ado di Padang.

hmmm lah sagitu se perkenalan diri ambo yo, kini masuak kacarito sesuai judul Pai Mandaki Ka Marapi Part I, hmm kalau ado Part I berarti ado Part II atau Part III yo sanak, basambuang- sambuang carito ko hahahahahah 

2 Tahun yang lewat tapeknyo tahun 2015 bulan 8, ambo waktu tu semester 3 waktu maso-maso kuliah, ambo samo kawan - kawan lah baniaik untuk mancubo mandaki gunuang, alun tau gunuang ma yang ka didaki kini ko goh eeh hahaha di SUMBAR ado Gunuang Marapi tinggi nyo 2.891 mdpl (meter di atas permukaan laut) yang berlokasi di Tanah Datar Agam, tu ado lo gunuang tertinggi di sumatera barat Gunuang Talamau tingginyo 2.920 mdpl lokasinyo di Pasaman Barat, ado Gunuang Singgalang tingginyo 2.877 mdpl lokasinyo di kab. Agam dan ado pulo Gunung Talang yang tingginyo 2.597 mdpl lokasinyo di Solok, a 4 gunuang ko yang familiar di talingo pendaki di sumbar, tapi masih banyak juo lai gunuang-gunuang di sumbar yang bisa didaki mode gunuang sago, gunuang tandikek dll.

Gunung Merapi Sumatera Barat

lah bahari-hari bapikia, mamiliah gunuang apo yang cocok , samo perlengkapan mandaki yang ado, diputuihkan mandaki tanggal 9 ka Gunuang Marapi, yang ka pai mandaki ado 7 urang ( 5 urang pendaki perdana ke gunung tamasuak diri ambo sendiri hehehe ) 2 urang lai kawan ambo alah acok juo pai mandaki. Bagi ambo yang masih amatiran sebagian urang banyak yang manyarankan kalau perdana rancak mandaki ka Gunuang Talang lai, soalnyo kalau ka Talang labiah pendek dari Marapi sagetek, tapi kalau mancaliak track tanah jalan nyo di Talang kalau hari hujan jan ditanyo - tanyo hahahah mandi lumpur wak dek nyo,, jalan sagetek gubrakkkk!!! turun gunuang maluncua kabawah, bahkan ado nan ampia baguliang - guliang bagai kalau kondisi hujan di Gunuang Talang tuh, kalau di Gunuang Marapi track tanah nyo lai ndag licin bana kalau di bandiang Gunuang Talang .. 

jadi di putuskan ka Gunuang Marapi pai ba 7 urang ( 6 cowok 1 cewek dan 4 motor) barangkek dari Padang jam 7 malam , menuju Bukittinggi.

(ambo,putra,andre,vany,ricardo,dhani,hari)

di Padang sado perbekalan untuk masak,tenda,konsumsi,tas,jaket jo sepatu lah dipersiapkan di siang harinyo,,ngumpua di kos si putra sahabih magrib. Ambo jo kawan - kawan lah bakumpua sadonyo di kos siputra, mancek - cek perlengkapan sadonyo, termasuk jan sampai lupo kamera dslr punyo dhani untuk dokumentasi wak heheheh ☺

Perjalan menuju Bukittinggi alhamdulillah lancar - lancar see sanak, hmm kiro-kiro tibo di tampek parkir motor di posko pendaftaran jam 9 an , di posko awak basamo mandaftarkan namo-namo kawan yang mandaki, mambayia parkir motor dan tiket masuk, waktu tu kalau ndag salah saingek ambo perkapalo 7000 dan untuak ciek motor 5000. Setelah pendaftaran diposko lah salasai , sudah tu awak basamo-samo baerdoa agar kelancaran dalam perjalan pai pulang selamaik, untuk sanak-sanak yang suko mandaki jan lupo badoa dulu sabalum malangkah hmmm tu ciek lai jan lupo minta izin dulu samo urang tuo bia perjalanan tanang dan urang tuo pun indag khawatir,,hmm ambo samo hari karano niak yang tinggi untuak mandaki, kalau minta izin ka urang tuo pasti indag diagiah izin, jadi ambo samo hari ma agiah tau urang tuo lewat telpon untuk mangecek an pai main katampek kawan, habis tu hati wak harus bisa dibaok batanang dan mangucap dengan niaik baik.hmmm (sambia bajalan sampai masuak ka pintu rimbo gunuang)

Jarak dari posko partamo sampai ka pintu rimbo , kiro-kiro sekitar 2 Km sekita 30-45 minik lah, habis tu sampai di muko pintu rimbo istirahat dulu, karano di pintu rimbo ado posko kaduo untuak istirahat, bisa juo disitu managak an tenda untuk barangkek isuak hari nyo, tapi kami ndag magak an tenda do, cuma istirahat sabanta habis tu jalan liak, bismillah masuak ka pintu rimbo....krik kriik krik

Kiri kanan kalam, rimbo, parak sadonyo, bagian paliang muko si Dhani nyo bajalan untuk manantuan arah jalan karanonyo alah acok pulo mandaki ka marapi tu ditambah pulo inyo ado punyo handlamp yang bisa manarangi jalan bagian muko samo bagian tangah jo kalakang, dan untuk paliang balakang bana ado putra yang alah pernah mandaki tapi indag acok bana lo ka marapi ditambah pulo putra ado punyo handlamp di bagian balakang untuak manarangi jalan dimukonyo, dan di bagian tangah kami balimo amatiran (vany,andre,ambo,hari,ricardo) jalan taruih sekitar 1 jam melewati jembatan bambu yang dibawah jembatan tu ado aliran sungai, pas pulo pasokan aia minum kami bakurang jadi di ambiak aia minum kabawah dulu sambia istirahat, setelah tu kami lanjut baliak jalan.

lah agak lamo bajalan lah sekitar 1 jam pulo dari jembatan tadi, manuruik ambo lah sampai satangah perjalanan ko mah hmmm dek ambo partamo pai mandaki lumayan taraso barek sagetek hahah maklum lah tuo hehehe istirahat sabanta minum aia bawarna panambah tanago hahah kiro nyo tambah auih wak dibueknyo hahah rancak minum aia putiah se lai,sekedar pambasah bibia kecek-kecek urang mode tu, kalau mandaki ko,minum tu jan basosoh bana, cukuik palapeh auih se alah tu mah hahaha ambo galak dulu dih ☺☺☺☺

jalan dilanjutkan track jalan mulai malangkah agak gadang, kiri kanan jurang, habis tu melewati jalan sampik , penerangan lah mulai agak kalam, nan si dhani nyo lah dulu2 se lupo manarangan kawan nan dilakang hahah yang dilakang lah maraba2,marangkak2 hahah tapaso basaba ndg ilang aka, ambo ado baok powerbank yang niak awal untuk mancas hp kalau batrai habih, heheh dipowerbank tu pas lo  ado senter nyo langsuang takan iduik lampu alhamdulillah nampak juo jalan hahahahaha tu kawan yang lain indag pulo ilang aka nyo di ambiak hp nyo di iduik an pulo senter nyo,,opsss iduik pulo lampu, lah mulai tanang, jalan baliak dan ndag lupo saliang maingek an kawan-kawan jan sampai kosong pikiran...hmmmm lah agak lamo juo jalan baranti baliak...manunggu kawan si ricardo nyo agak latiah nampaknyo yo duduk lah wak dulu basamo hahah maklum lah ricardo baban badan nyo agak barisi sagetek tu ditambah pulo partamo mandaki ka Marapi.

perjalan lah maabihan waktu 4 jam , dan manunjukkan waktu pukua jam 1 dan itupun masih satangah jalan , kalau urang lah biaso mandaki gunuang marapi 4 jam an, mujngkin nyo lah tibo dipintu angin / istilahnyo cadas , yaitu disitu tampek yang alah bisa untuak istirahat managakkan tenda dan indag jauah pulo lokasinya dari puncak do,.

perjalan lah agak lamo, lah mulai jauah , raso-raso ambo ko lah ampia tibo, lah agak jarang nampak pohon-pohon rimbo, lah mulai nampak langik tarang, ndag lamo sudah tu lah bisa lo mancaliak lampu - lampu rumah yang di bawah, jalan taruih mandaki nanjak, sampai juo di pintu angin tampek yang di tunggu-tunggu kironyo lah banyak juo yang managak an tenda disitu , dicari caari tampek yang agak lapang stek untuk managakan , pas hari manunjuakan pukua 3 dhani jo putra mambukak carrier/ tas gunung untuak managak an tenda , dan ambo jo kawan yang lain manolong sagetek-sagetek, ndag lamo sudah itu tenda pun lah tagak, lah bisa di huni , hari lah manunjuak an pukua 4, kami sadonyo lalok lai, rencana bisuak pagi jago pagi-pagi nio mancaliak sunrise dari ateh puncak, hmmmm zzzzzz zzzzzzz lalok dulu sanak,, 

carito basambuang ka artikel sabalah yo...